Ko e taha e ngaahi me’a ne ako ki ai ‘a e kalasi ni ko hono fa’u ko ia ‘o e ngaahi maau. Ko e ni’ihi leva eni e ngaahi maau ne nau ngāue’aki pea mo e ni’hi na’a nau hanga ‘o fa’u.
FAINGATA’A FAKAENATULA
- Ko e ngaahi faingata’a fakaenatula′
‘A e afa,tafea,mofuike pea mo e peau kula′
‘Oku tau faka’amu ke ‘oua na’a to mai ki hotau fonua
He ko ki taua pe te ta fua hono ngaahi faingata’a.
- Ka tō mai ‘a e afaa′
‘Uha, havili pea a’u ‘o tafeā
Mahu’inga ke ta mateuteu he taimi kotoa
Maau e vai,me’akai mo e maama
He ‘oku ‘ikai te tau ‘i ‘a hono fuoloa′.
- Ko e mofuike′ mo e peau kula′
‘Oku fakailifia hono iku’anga′
‘Oku ne liliu e fonua
Holoki e fale′,maumau’i mo e hala
Pea ka hake mai mo e peau kula′
Ko ‘ene toki a’u ia ki he faka’ofa
He ‘alu ia mo ‘eta me’a kotoa.
- Ta u teueteu ‘oua ‘e nofo noa
Na’a tau toki hanga hake kuo ta faka’ofa
‘Ikai ha me’akai,vai mo ha maama
Kia ko e mo ho’o fāmili kotoa′.
Loto to’a/’Oua e fiu ngofua
Ko au ko e tokotaha lototo’a
Tukuingata he ngaahi me’a kotoa
Ka ‘i he taimi lahi ‘oku ou fa’a toumoua
He ‘oku fa’a tukuhifo au ‘e hoku fanga tokoua
Maumau’i ‘a hoku loto ‘ou fa’a lotomo’ua
Fa’a lotomamahi pea mole ai mo si’oku taumu’a
Kataki pe kapau ‘oku ou fu’u fiungofua
Fa’a lau ko e moana pe hoku ki’i taputa
Ko e kole ke ta kauhalataha mu’a
‘Oku ‘Ikai ha to’a ia ‘e tu’u tokotaha
‘Io ko e ikuna ‘oku ‘ikai faingofua
Ka ‘oka hoko pea ‘oku tau fiu hono tanaki hono ngaahi monu’ia.
Lotosi‛i
Taimi ni’ihi ‘oku ou lotosi’i
Fa’a ngaue pe ka ‘oku ‘ikai ha ivi
Pea kapau ko eni , tu’u ‘o ki’i taimi
Fakakaukau ki ‘api mo e mata si’o famili
‘Oua na’a ngalo ‘oku nau kei tali mai
Ki ha kukukuku te ke ‘oange ke nau ‘inasi ai.
Ko e taimi ‘oku taa pe mo laka
Ko eni ‘oku ta mei ‘osi mei Sia Ua
Ko e haa e me’a te ta ‘alu moia
Hei’ilo ko e ha’o lau ka ‘oku tui ‘oku ta kei hala
Ki’i pine hifo pea ta faka’aonga’i mu’a
Si’i ngaahi tou’anga ‘oku fai ma’a kitaua
Kau Fakataha
Tau kau fakataha ke hiki ki ‘olunga
Ha taha ‘oku faka’ofa ‘a hono tukunga
‘Oku lahi ‘a e ngaahi founga
Fakalotolahi, Fe’ofa’aki pea mo Faka’apa’apa
‘Oku ‘ikai ha to’a ia ‘e tu’u tokotaha
Fiema’u pe ke tau pikipiki hama
He ‘oku ‘ikai te tau ‘ilo ‘a e e fononga’anga
Pe ko e haa te ta fetaulaki moia
Ta lototo‛a mu‛a pea ta kãfataha
Pukepuke ‛a fufula si‛ota fanga tokoua
Fakamolemole ‛oua na‛a ta siokita
Fai hota lelei taha pea te ta ikuna
Ko hoku fatongia
Ko kitaua Tonga ‘oku ‘i ai hota fatongia
Ke ta tokanga ke fakakakato he taimi kotoa
Pe ko e fefine pe tangata kita
Pau pe e fatongia ‘o ‘ikai hao ai ha taha.
Ko hota fatongia ‘oku ‘ikai fiema’u ke fakamu’omu’a nima
Ka ‘oku faka’amu ke ta fai ‘osikiavelenga
Kalusefai ‘eta fiema’u mo ‘eta me’a kotoa
Loto’aki pea te tau ikuna noa
Ko ‘eku tamai
Si’eku tamai ko e tangata lotolahi
Kalusefai ‘ene mo’ui mo hono taimi
Ke fakalato e fiema’u si’omau famili
‘Ikai te u ‘ilo ko e haa ha me’a te u fai
‘I ha taimi te ne puli ai pea mei mamani.
Ko ‘eku lotu pe ke ne mo’ui fuoloa
He taumaia ‘e ‘I ai ha taha ia ‘e ‘ofa tatau moia
Neongo ‘eku tonounou ka ‘oku ne hiki pe au ki ‘olunga
Faka’olunga hono uma holoholo hoku lo’imata
Si’I fakamunomuna ‘ene ‘ofa ‘I hoku telinga.
‘Alaa si’eku tamai, si’i mate he ‘ofa atu
‘Oua te ke tokanga he ‘oku ou ‘ilo a ho’o fiema’u
Ke u fai hoku leleitaha ke u hoko ‘aki atu
Fiema’u hotau famili telia e kaha’u
Hoku fanga tokoua mo e fanga tuonga’ane
Tuku e faifai loto mo e taataakehe
Ta kau fakataha pea lotu ma’u pe
Ki he ‘Otua ke ne kei kau pe
Si’etau ngaahi tamai mo ‘enau ngaahi ngāue.
Koe mahu’inga ‘o e ako
Ko e kakai ako ko e kakai fakapotopoto
‘Ikai fa’a lea noa’ia fa’a manako fakalongolongo
Ni’ihi ‘oku ‘ikai lelei e ako
Fa’a fakakina, longoa’a, pea ‘oku fa’a fu’u fakapiko
Mahu’inga ke tau ako pea ke tau poto
Feinga ke ‘ilo ‘a e hala fe’unga mo hao
Ke tau fou ai telia na’a tau to
Ngaahi fakatauele ‘a e tevolo
Ko e poto ko e me’a’ofa ‘a e ‘Otua
Ki ha taha ‘oku fai ‘osikiavelenga ‘ene feinga
Ko e toki tapuaki ta’e’amanekina
‘Okapau ‘e ‘inasi ha taha mo si’ono kainga
Ko e Lea Faka-Tonga
Ko e Lea Faka-Tonga mo hono mahu’inga
‘Oku ‘ikai ke sola ia ki he Tonga
Fai’aki ia ‘a ‘eta fetapa
Pea tokoni’i ‘aki e sola ke lata
Kapau ko ha Tonga kitaua
Taa ‘oku ‘i ai hota ngafa ke fua
Paotoloaki pea Pukepuke ‘a fufula
Lea Tonga telia na’a mōlia.
Lea Faka-Tonga ‘a ‘eta koloa
Ke ta kahoa’aki he feitu’u kotoa
Tukuingata he me’a kotoa
Manatu kiai ‘oua na’a ta munoa
Te u polepole he’eku Tonga
Tui hoku ta’ovala pea mo u lea faka-Tonga
Taumaia ‘e ‘I ai ha taha te ne to e ‘ekea
He ko ‘eku Tonga ‘oku faka’Otua
Famili
‘Oku mahu’inga kiate kitautolu hotau ngaahi famili
Nofo fakataha pea fetokoni’aki
‘Ikai ha taimi ‘oku te ongo’i lotosi’i
He ‘oku ‘i ai ma’u pe ‘a e taha ke tokoni
Ka ‘i ai ha taimi ‘oku ou ongo’i li’ekina
Fa’a tu’u mai hoku ‘o fai hoto poupoua
‘Ikai lau ha taha ki si’oku tuofefine mo hono le’o fakanonga
Toki kau fakataha mai mo ‘eku tamai ‘o nau hiki au ki ‘olunga
‘Oku ou ‘ilo ‘oku lahi hoku fatongia
He kuopau ke u ‘ofa ki hoku famili kotoa
Koia ai teu fai hoku lelei taha
Talia ‘enau akonaki kotoa
He ko kinautolu pe ‘e lahi ‘enau ‘ofa
Faka’apa’apa
‘Oku ‘iloa e Tonga he mo’ui faka’apa’apa
Ko ia ‘oku ne fa’uutaha e me’a kotoa
Kamata pe mei ‘api ‘o a’u ki he nofo ‘a kainga
Pea mo ha feitu’u pe ‘oku ‘I ai e Tonga
Ko e faka’apa’apa ‘oku ‘ikai sola ia ki ha taha
‘Oku tala’aki hoto teunga mo ‘ete lea
‘Uma’aa ‘ete laka pea mo hoto fotunga
Mahu’inga he ‘oku ne faka’opo’opo hoto ‘ulungaanga
‘Oku ta’ovala e Tonga ko e faka’apa’apa kia Tupou mo hou’eiki
Fakalongolongo ‘o talifatongia ‘a e tuonga’ane ki hono tuofefine
‘Oku silongo e kainga he taimi ‘oku talafatongia ai e ‘ulumotu’a
‘Isa ‘oku nima mo va’e e tehina he fakaongoongo ki he ta’okete
SIA UA
‘Isa ‘e ngalo ‘a fee ‘a e ‘Iuniti Sia Ua
Pea mo hono kau faiako fakangalongata’a
Tuki mo nonofo kita ki he lelei taha
Pukepuke ‘a fufula ‘etau lea Tonga
Ko Sia Ua mo hono ‘aonga
‘Ikai sola ki ai ha taha
Ako’I kita he tohi, fika mo e laukonga
‘Uma’a hono tokangaekina hoto ‘ulungaanga
